Rasoolallah ﷺ Noor Hai* Ahle Sunnat Wal Jama'at Ka Aqeeda Hai Ke Rasoolallah ﷺ Noor Bhi Hai Aur Bashar Bhi Hai Aur Yeh Rasoolallah ﷺ Ka Mo'jeza Aur Allah Ta'ala Ki Qudrat Hai Aur Mo'jeza Aur Karamat Kehte Hi Use Hai Jo Insaan Ke Dimaag Me Na Baithe.

 Rasoolallah ﷺ Noor Hai* 

Ahle Sunnat Wal Jama'at Ka Aqeeda Hai Ke Rasoolallah ﷺ Noor Bhi Hai Aur Bashar Bhi Hai Aur Yeh Rasoolallah ﷺ Ka Mo'jeza Aur Allah Ta'ala Ki Qudrat Hai Aur Mo'jeza Aur Karamat Kehte Hi Use Hai Jo Insaan Ke Dimaag Me Na Baithe. 

 *1 - Sureh Al-Maidah Aayat No.15* 

Tarjuma - "Beshak Tumhare Pass Allah Ki Taraf Se Ek Noor Aaya Aur Roshan Kitaab".

Iss Aayat Ki Tafseer Me Mohaddiseen Wa Mufassireen Wa Ulema Ka Qaul Padhiye

 *1 - Tafseer e Samarqandi, 1/424)* 

Tarjuma - Faqeeh Abul Lais Samarqandi Rehmatullah Alaih Farmate Hai Ke "Noor Se Muraad Mohammad e Mustafa  ﷺ Aur Qur'aan Hai".

 *2 - Tafseer e Bagavi,  2/17)* 

Tarjuma - Imam Abu Mohammad Husain Bin Mas'ood Bagavi Rehmatullah Alaih Farmate Hai Ke "Noor Se Muraad Mohammad e Mustafa ﷺ Hai Aur Ek Qaul Yeh Hai Ke Isse Muraad Islam Hai".

 *3 - Tafseer e Khaazin, 1/477)* 

Tarjuma - Allama Khaazin Rehmatullah Alaih Farmate Hai Ke "Noor Se Muraad Mohammad e Mustafa ﷺ Hai, Allah Ta'ala Ne Aapko Noor Isliye Farmaya Ke Jis Tarah Andhere Me Noor Ke Zariye Hidayat Haasil Hoti Hai Usi Tarah Rasoolallah ﷺ Ke Zariye Se Bhi Hidayat Haasil Hoti Hai".

 *4 - Tafseer e Jalalain, Safha No.97* 

Tarjuma - Allama Jalaluddin Suyuti Rehmatullah Alaih Lafze "Noor" Ki Tafseer Karte Huwe Farmate Hai Ke "Noor Se Muraad Nabi e Kareem ﷺ Hai".

 *5 - Tafseer e Saawi, 2/486)* 

Tarjuma - Allama Saawi Farmate Hai Ke "Huzoor e Akram ﷺ Ka Naam Iss Ayat Me Noor Rakha Gaya Isliye Ke Huzoor e Akram ﷺ Baseerato Ko Roshan Karte Hai Aur Unhe Rushd Wa Hidayat Farmate Hai Aur Isliye Ke Huzoor e Akram ﷺ Har Noor e Hissi (Jise Dekha Jasake) Aur Ma'anavi (Jaise Ilm Wa Hidayat) Ki Asal Hain".

 *6 - Tafseer e Kabeer, 4/327* 

Tarjuma - Imam Fakhruddin Raazi Rehmatullah Alaih Farmate Hai Ke Yeh Qaul Ke Noor Aur Kitab Dono Se Muraad Qur'aan Hai Yeh Za'eef Hai.

 *7 - Tafseer e Ruhul Ma'ani, 5/367* 

Tarjuma - Allama Sayyed Mehmood Aloosi Baghdadi Rehmatullah Alaih Farmate Hai Ke Iss Noor Se Muraad Tamam Nooro Ke Noor, Rasoolallah ﷺ Ki Zaat Hai.

 *8 - Sharah Shifa, Jild No.1, 1/51* 

Tarjuma - Allama Mulla Ali Qari Rehmatullah Alaih Farmate Hai Ke Aur Konsi Rukawat Hai Iss Baat Se Ke Dono Ne'mate Ya'ni Noor Aur Kitaabe Mubeen Rasoolallah ﷺ Keliye Ho Beshak Rasoolallah ﷺ Noor e Azeem Hai Anwaar Me Unke Kamaal Zahoor Ki Wajah Se Aur Rasoolallah ﷺ Kitaab e Mubeen Hai Iss Haysiyat Se Ke Aap Jam'e Asraar Ke Jam'e Hai Aur Ahkaam Wa Ahwaal Wa Akhbaar Ke Mazhar Hai.

 *9 - Al Juz'ul Mafkood Minal Musannaf Abdul Razzaq, Safha No.62, Hadees No.18* 

Tarjuma - Abdur Razzak Mo'mar Se Aur Woh Ibnul Munkadir Se Aur Woh Hazrat Jabir Radiallahu Anhu Se Riwayat Karte Hai Ke Woh Farmate Hai, Maine Rasoolallah ﷺ Se Poocha Ke Allah Ta'ala Ne Sabse Pehle Kis Cheez Ko Paida Farmaya? Rasoolallah ﷺ Ne Irshaad Farmaya : Aye Jabir ! Allah Ta'ala Ne Sabse Pehle Tere Nabi Ke Noor Ko Paida Farmaya. (Sahih Hadees)

 *10 - Jame Tirmizi, Hadees No. 3609* 

Tarjuma - Hazrat Abu Huraira Radiallahu Anhu Se Riwayat Hai Ke Logo Ne Poocha : Ya Rasoolallah ﷺ Nabuwwat Aapke Liye Kab Wajib Huwi? To Rasoolallah ﷺ Ne Irshaad Farmaya : "Jab Aadam Alaihissalam Rooh Aur Jism Ke Darmiyaan The" (Sahih Hadees)

Note - Hazrat Aadam Alaihissalam Se Pehle Bhi Humare Nabi ﷺ Maujood The, Ab Sawal Yeh Paida Hota Hai Ke Jismani Taur Par Ya Noorani Taur Par, To Jawab Simple Hai Ke Noorani Taur Par Maujood The.

Alhamdulillah Qur'aan Wa Ahadees Wa Mohaddiseen Wa Mufassireen Ke Aqwaal Se Yeh Bilkul Waazeh Hogaya Ke Humare Nabi ﷺ Noor Hai Aur Jo Nabi Ke Noor Hone Ka Inkaar Karta Hai Goya Woh Qur'aan Wa Hadees Wa Mohaddiseen Wa Mufassireen Ka Inkaar Karta Hai.